台北自由行-台北住宿-台北好去處-台灣自由行
到今次A Head Full of Dreams Tour雖然佢地都係唔去香港，但亞洲區就多左好多分站，除咗必定有的日本，仲有台灣台北、菲律賓同新加坡。連續錯過兩個Tour，今次呢個台北行程真係不容有失，收到消息立即打畀演唱會鐵腳豪哥問下佢有冇興趣同行，豪哥爽快答應，我隨即聯絡台灣朋友幫手買演唱會飛。原先得一場買唔到 (冇錯係連出動埋台灣朋友都買唔到，黃牛炒到接近一萬蚊一張飛！)，非常幸運地Coldplay台北加開一場，令我地都買到飛。如果唔係好似我咁有朋友幫手買飛，其實都冇問題，因為台灣演唱會的購票過程同香港係一樣，都係坐定定準時上網買，而拎飛方面更加唔洗擔心，現場會有取票區。
期待已久終於到11/4出發去台北，今次坐之前襯平買的中華航空（HK$1127，復活節長假前都算抵啦），比想像中好，仲有炒麵食添！好過因航啦 XD。
一個鐘多少少就順利到達，今次係第四次來台北，一落機有種說不出嘅熟悉感覺！來之前台灣朋友都提定台北天氣麻麻地，將會有雨加大風。現場所見天色真係灰灰暗暗，心中希望晚上睇演唱會時唔好落雨。拎完個大Backpack就即刻走去試試2017年2月2日先開通的桃園機場捷運 (可以直達台北，唔洗再搭客運，爽！)今次Coldplay 演唱會的場地係桃園高鐵站前，幾個站就到！
一落車即刻衝去借Locker放Backpack，可惜桃園機鐵站既Locker一早已經full晒，幸好在機鐵站旁的購物好去處GLORIA OUTLETS華泰名品城順利搵到一個 (同日本premium outlet一樣樣)！話說搵Locker途中有個小插曲，當時我已入錢準備鎖Locker門，有兩位台灣女生過來問我地係咪都係睇Coldplay，可唔可以將佢地個包包一齊放再夾返錢，呢個情況相信在香港絕對冇可能發生，我地當然冇所謂啦，最後錢冇收，鎖埋佢地個袋就約定睇完一齊來拎。
與此同時，台北天氣開始轉壞，落住雨又愈來愈凍，睇睇個訊號牌，得16度，得件薄外套真係唔夠洗！幾經辛苦終於買到件雨衣，去埋7 eleven食少少野就入場等喇！
大會的安排相當不俗，演唱會門票本身除了劃區亦有劃位，排隊進場時已分好邊個先邊個後，唔洗爭。台灣朋友果然非省油的燈，我地張台北演唱會飛原來係區內既第一行，除咗有鐵馬可以借力狂跳之外，前面仲要無遮無擋，簡直係無得頂呀。等到6點幾暖場嘉賓終於出場，不過佢地唱左大半個鐘個場都係唔暖…冷冰冰的。
7點半Coldplay準時到達開場，Chris Martin狀態大勇，極速入局。一連獻唱經典歌曲，包含Yellow、The Scientist、Viva la Vida、In My Place、Fix You… 再加上新碟的Bird、Everglow等等、台下人立刻陷入瘋狂狀態，身邊嘅尖叫聲不絕！唱到半路，天公不造美，落起雨來，但大家都無視，繼續跳繼續大聲跟住唱，強勁既音響效果配上特備進口既煙花，一片夢幻的感覺，難怪台灣Fans也大叫Dream come true。
Chris在舞台上來回奔跑，加上招牌大型氣球、毫不吝嗇的煙花、台下一起互動的閃光手帶，全場都玩得好High！演唱會尾段，Chris仲即興創作一首Taiwan Song送俾台灣，全場氣氛推至高峰。
台北演出2小時絕無欺場，今個Trip不枉此行。同一個show，同一個rundown，來之前我已經在YouTube loop左好多次，但現場睇真係兩碼子的事，嗰股震撼心靈的力量非筆墨形容。睇完就知點解Coldplay唔來香港，佢地對場地的要求 (露天、企得4萬人、可以放大型煙花、可以播強勁音效)，香港唯一滿足到的係大球場，但跑馬地附近的人點會肯呀。
餘音繞樑，演唱會已過近半個月，腦中仍然loop住個rundown，仍舊沉醉著。人生有個演唱會腳的確係好極，下次終極目標，英國Glastonbury ！
台北住宿：Flip Flop Hostel
來看我的台北酒店推介。睇完Show，雨落得愈來愈大，冒著雨去Outlet拎埋Backpack，俾埋個包包台灣女生之後，我地就去坐捷運出台北車站的Flip Flop Hostel check in。是次台北住宿推介：呢間Hostel真係值得力推，佢的Check in 時間去到零晨2點，岩晒我地呢D夜鬼；位置方便，距離捷運站只有幾分鐘嘅路程，對面仲有間Seven Eleven，旅客好去處應有盡有。
其實我去完澳洲Working Holiday之後都冇再住過hostel，難得今次可以同演唱會腳住吓，回味一吓一齊歐洲Grad Trip的日子。呢間台北hostel設備好完善，房夠大，有獨立locker，床舖舒適，廁所位又夠多又乾淨，Common area夠大仲要有早餐提供，呢間可能係我人生中住過最好既Hostel，絕對值得推介。
今次我地入住三人房，每人每晚都只係550台幣，即約HKD120，獨行的時候，Hostel真係一個好選擇，唔洗一個人住酒店咁貴。咁岩得咁橋，室友又係香港人，又係岩岩睇完Coldplay，估計呢兩日台北都充斥住來睇演唱會的人吧。
去台灣睇演唱會告一段落，仲想睇埋有咩台北好去處啱大家玩，睇埋小弟下一篇Blog啦！
台灣自由行：便利店必買必食懶人包 (甜品篇-雪糕．布丁．沙冰)
台北好玩景點行程推薦：四獸山之象山散步行山！
台北美食自由行行程：早餐店必食餐廳！
GoFlyLa
酒店機票旅遊優惠代碼
（香港人請進）https://hk.goflyla.com/酒店優惠代碼
（台灣人請進）https://tw.goflyla.com/優惠代碼